Cunti e dici

Cunti e dici
di Er. Ga.

Mo mi cunti e pua mi dici
Duva fhusti ajieri sira
Ti dassai cu quattru amici
Ma ti pierzi pua de mira.

Io no’ sacciu e no’ mi spiegu
A chi vi serva st’adunata
E fazzu buonu e mo ti spiegu
Ca pe mia è na buffonata.

Chi nci truovi tu de stranu
Si ogni tantu ni vidimi
Tornau n’amicu americanu
E ni ncuntramu mu parramu.

De quand’ierumu cotrari
Ni criscimmi tutti assiemi
Pua arrivau lu militari
E cominciaru li problemi.

Cui partiu pe’ nta Milanu
Cui a Torinu, cui nta Roma
Nc’e’ cui jiu cchjiu’ luntanu
Mu si pigghja nu diploma.

Puru tuna si nci pienzi
Ti nda jisti pe’ cinc’anni
E no’ mi dira “su scemenzi”
E ca no’ provocasti danni.

Ti ricuordi chigghu trenu
Tuttu curmu, paru paru.
Chiggha puzza de vagoni
Cuomu fhussa “u tavernaru?”.

Nc’era puru cui partia
Cu na navi sdarrupata
Cu a speranza si nda jia
Nta l’America arriccuta.

L’attru jiuornu rientrau
Doppu appena cinquant’anni
Pemmu ncuntra a cui dassau
E l’amici do’ sangiuanni.

Fhorse ancora ti ricuordi
Ca abitavanu o Carvaru
Cuomu fhai pemmu ti scuordi
Mastru Ntuoni lu scarparu.

Risolava scarpi viecchj
Mpingia attacci e supatacchi
Tuttu ntuornu catapiecchj
E strati chjni de palacchi.

Già passaru cinquant’anni
E vo’ mu trova li sua amici
Puru chigghi catananni
E a stu puntu, chi nci dici?

Chiggha busta duva stacia?
Cu li fhotu de cotrari
Ha mu vijiu si nci piacia
E si ricorda i “betulari”.

Chigghi fhotu nta la villa
Nta lu campu o a lidu e mara
Si nci vena la scintilla
E si comincia a ricordara.

Già domanda e certi amici
Chi purtroppu no’ nci sunu
E no’ sai chi hai mu nci dici
E si è giustu e opportunu.

Cuomu fhai pemmu nci dici
Ca Michieli si nda jiu
Totu e Brunu, i miegghjiu amici
Si li chjiamau e li vozza Ddio?

De li fhimmini na stragi
Tra Rosetta cu Bettina
Nci mandamu dui suffragi
Ad’Antonella cu Cettina.

De Nicola, Giuanni e Vitu
Anna, Peppa e puru Lina
Certu resta allibitu
Fhu pe tutti na rovina.

Ma pecchi no’ nci parrati
De li fharzi de’ Don Mariu
De li Bettuli affollati
E vi scriviti nu sommariu.

De li sindaci passati
De lu mara sempre giallu
De li casi sdarrupati
O de’ i cerasi e Pinu Gallu.

De li squatri de palloni
Propi chiggha chi vinciu
Chi arrivau a la Promozioni
E de corpu pua fhalliu.

O de chigghi d’Acconia
Chi testardi vanu avanti
Chi perdia e pua vincia
E tutti quanti su cuntienti.

Si ha voglia mu camina
Lu portati a la Rugheggha
Ca nc’e’ all’umbra na panchina
E ncuntra ncuna vecchjiareggha.

O lu portati a Santu Lia
E s’e’ veru curinghisi
Vida puru Gizzeria
E lu Platanu de Vrisi.

Si nchjianati a la Contissa
E lu cielu esta serenu
Nta la testa già si fhissa
Sia lu jioniu ca u Tirrenu.

Ma purtroppu su convinta
Ca nta tutti st’adunati
Li discurzi su’ na fhinta
E cu lu vinu esagerati.

Ca l’amici su na scusa
Si a li carti fhai lu fhrancu
Ca ognunu e vui nd’abusa
Sia de russu ca de juancu.

Viva tu ca vivu io
Nu bicchieri tira n’attru
Nci vo’ sulu a manu e Ddio
Pemmu vi nda jietta quattru.
Er. Ga.

Suonnu

Suonnu

(Er. Ga.)

Quandu u stomacu l’hai chjinu
E a cuscienza l’hai pulita
Basta sulu nu cuscinu
E ti ricriji tutta a vita.

Ma quandu sini ndormiveglia
No’ controlli cchjiu’ la menta
E no’ sienti mancu a sveglia
E tanti cuosi ti rammenta.

Vajia ngiru nmodu stranu
Parra, senta e si ricorda
Ti riporta cchjiu’ luntanu
ggha ti dassa e si nda scorda.

Ti ritruovi a lu paisi
Cu l’amici de’ na vota
Tutti quanti curinghisi
Nta la chjiazza rumorosa.

Giuanni, ntuoni, totu e micu
Parmu, giacumu e vicienzu
Nugghu e nui fhu mai nimicu
Ed’e’ a chisti chi io pienzu.

Ni cuntavumu ogni jiuornu
Mu jiocamu a lu palloni
E non’era mancu scuornu
Pe’ cui era nu bidoni.

Li carrieri e li rioni
Tutti chjini de’ cotrari
Fhurbi, sbierti e bacchettoni
No’ cercavanu dinari.

Sulu jiuocu e passatiempu
Si jia ngiru e si scarava
Ma quandu ierimu nto campu
Puru a fhami ti passava.

Tuna Totu, jiuochi mporta
Sandru e Giacumu ndifhesa
Parmu e Cicciu  mu sumporta
Palla a Peppa, e i fha cinesa.

Brunu jioca all’ala destra
Giuanni fhacia lu terzinu
Nc’esta Ernestu a la sinistra
E stai sicuru ca vincimu.

E Vicienzu duva jioca?
Dissa Parmu a cumpagnia,
Cuomu a Micu mu s’apprica
E pemmu sta vicinu a tia.

Sandru e testa respingia
Pemmu sarva la difhesa
Mentre Giacumu cadia
Zumpa Totu e fha na presa.

Nta lu suonnu m’agitava
E volava campu campu
Sentia Peppa chi gridava
E fhicia gollu nta nu lampu.

Mentre ierumu abbrazzati
Ntisi fhorta nu fhrastuonu
Apru l’uocchji e su sparuti
Cchjiu’ veloci de lu truonu.

Mi ritruovu nzonnicchjiatu
Guardu e giru tuttu ntuornu
Era tuttu trasudatu
Pecchi’ tuttu era nu suonnu.

Er. Ga.

Amici

Amici

(Er. Ga.)

Non’e’ sulu nostalgia
Ca nc’e’ puru soffetenza
Ca no’ su’ duva voria
E suppuortu mpenitenza.

E non’e’ pecchi lu dici
Pe’ li gienti e pe’ li strati
Mi dispiacia pe’ l’amici
C’haju spessu trascurati.

No’ pretendu pemmu jiuocu
A calcetto o a lu palloni
Ma armenu pe’ nu puocu
Mu fhacimu li sbruffoni.

No’ su mancu espertu e carti
Com’è’ Parmu, com’è Cicciu
Ca pe’ igghi è propi n’arti
Ma pe’ mia è nu pasticciu.

Io, cu Giacumu e Vicienzu
Tutti tri malati e cora
Ni movimu cu discienzu
Cu a Speranza ca migliora.

Ma si pienzu ad’attri amici
Chi tra nui no’ nci su cchjiuna
Io no’ sacciu tu chi dici
Ca disperu pua decchjiuna

Ntuoni, Peppa, Rosa e Totu
Cu Michieli, Giuanni e Francu
Fhu nu veru terremuotu
Si nci pienzu sugnu  affrantu.

Troppu giuvini spariru
Nto’ momentu de la gloria
Nci fhu l’urtimu respiru
Ma restaru nta memoria.

Pe’ virtù, pe’ ntelligenza
Pe’ la bona educazioni
Nci bastava la presenza
E attiravanu attenzioni.

Si parrava de la scola,
De’ politica, elezioni
De’ Rivera e de’ Mazzola
Cu rispettu e cu passioni.

No’ mancava l’argomentu
Ne’ la grinta o nu palloni
Tuttu era nu turmientu
Ma de cchjiu‘ l’emigrazioni

Si penzava a cui partia
Cui de’ nui potia restara
mu guadagna si potia
E chi lavoru potia fhara.

Sandru e Brunu si nda jiru
Lu paisi abbandunaru
Pe’ l’America partiru
E de’ tandu no’ tornaru.

Nui chi fhummi fhortunati
E restammi a lu paisi
N’arranciammi pe’ li strati
Superandu fhami e crisi.

E sfruttammi l’occasioni
Chi la scola ni dunau
Conquistammi profhessioni
Chi ngghu e nui mai si sonnau.

Simu ancora tutti amici
Affettuosi e rispettosi
Fhuru tanti i sacrifhici
Ma de cora generosi

QUANDU ERA IO COTRARU

QUANDU ERA IO COTRARU

(Er. Ga.)
Quandu era io cotraru,
puocu ranu nto’ granaru,
pe’ ogni strata e ogni vijiuolu,
ncuntravi sempre ncunu fhigghiuolu.

Purvulata supra e sutta,
t’arrivava nta la vucca,
de ciucci, puorci e de gagghini
tutti li strati eranu chjini.

Grida e schiamazzi
de fhigghiuoli abbarundati
Sentivi de ogni vicu,
puntuni e pe’ li strati.

Ragghjiu de ciucci
e abbajiara de cani
eranu pe’ tutti
segni de richiami.

Uomini e fhimmini
tutti abbarundati
Cu zzappi, runchi
e pe’ fhara vucati.

E tanti vuoti
arrivava la sira,
avivi fhatigatu
pe’ fhara menza lira.

Quantu vuoti,
e la memoria no’ m’inganna,
zziema rescìa mu fhacìa
menza canna.

E pua Mamma,
cu nu fhilu ncorcinatu,
de li mani
nci nescìa lu lavuratu.

Pana de viscuottu
e scadi assulicchiati,
cipuggha cu posedda
sfamaru fhamigghiati.

Verdura d’ogni tipu
inchìa la cassalora
e la gente s’adattava
pe’ tala nommu mora.

Na fhrasca de livara
mpenduta cu nu chjiuovu ,
dicìa ca nc’era vinu,
però de chigghu nuovo.

Pana de fharina
però de chiggha ijanca,
no’ si nda vidìa pe gula
ne’ a destra e mancu a manca.

Vicienzu Caramicu,
ancora esta arrimisu,
ca li piedi nta li scarpi
mai si l’havia misu.

Quandu li potta avira
si ntisa nu fhigurinu,
si li mentia a la chiazza,
ma fhina nta pruscjinu.

Lu fhrata povariegghu
si fhà l’inalazioni,
si parta pè Caronte
cu attri ‘nprocessioni.

Nci dissa pua n’amicu
“stu pana esta integrali”,
pecchì no’ ti l’accatti
ca ti caccia d’ogni mali?.

Si tuna sì cunvintu,
accattatillu a jiosa,
ca a mia no’ mi nda para
ca esta na gran cosa.

De chistu nda mangiai
de giuvini e cotraru
li gargi mi scorciai
chi ancora sientu amaru.

Cumpara Lia Scupazzu
de tiempu era emigratu,
attraversau l’oceanu
cuomu nu disgrazziatu.

S’havia ripiccicatu,
sistematu cu li cazzi,
si nda tornau a Curga
ca ggha non nc’era razzi.

Chi dira mo’ de chisti,
sia giuvini e cotrari,
chi mangianu la pizza,
nutella e cuosi strani?

Mu dura certamante
a tutti nci auguramu
Però, si jiamu arriedi ,
adduva n’aggrappamu?

  • (tra osservazioni, racconti ascoltati e realtà vissute)

Quandu vitti a Parmu sulu

Quandu vitti a Parmu sulu

di Er. Ga. dedicata al mio amico

Quandu vitti a Parmu sulu
Assettatu ‘nta lu Passu
Domandai: duva sunu
L’attri gienti, ijiru a spassu?

Nd’havìa tanti de’ perzuni
Ma, passaru a nova vita,
E tant’attri emigraru
Pe’ lavoru e no’ pe’  gita.

Mi ricuordu mastru Micu
Mastru Giulu e don Peppinu
A lu Tonzu e mastru Vitu
E mastru Pietru cu lu vinu.

A Giuseppe, a don Pasquali
Cu li mani nsanguinati
Chigghji gienti a Triccannali
Chi fhacianu li vucati.

Io la notta no’ dormivi
Ca penzava a Parmu sulu
Pua la fhotu rividivi
Ma, ni pigghjia pe’ lu culu?

Tanti machini ggha fhiermi
E l’autisti duva sunu?
Tutti quanti sunu nfhiermi
E de sani mancu unu?

No’ nc’è propi de’ cridira
Ca lu Bar è spalancatu
Ncunu ha puru de’ servira
Si nci cierchi nu gelatu.

Ca na vota nta sta chjiazza
Tutti i jiuorni nc’era fhera
Cu perzuni d’ogni razza
Recitandu na preghiera.

E sentivi ncuna serra,
Nu martiegghu chi pistava
Cui de’ l’uortu la sua terra
Era ggha chi la zzappava.

Nc’era puru cu tessìa
Tanta trama pe’ linzola
Licrezzuzza chi mentia
Li canniegghi nta la spola.

De la chjiazza si sentìenu
De’ lu Spizzu, a Petrachjiana
Tutti chigghji chi tessienu
E cu mpurnava mu fha Pana.

Nc’era puru cu assettatu
A lu muru de’ lu passu
Si fhacìa lu sbinturatu
Chi sembrava nu gradassu.

Vacabundi nd’happa sempra
No’ mancaru i mbrijiacuni
Nci fhu puru cu havìa tempra
E cu fhacìa lu chjiacchjieruni.